Oei, oei, oei..
In jier of wat lyn haw ik ris in stikje skreaun oer de machtige Cambell einen
dy 't harren op 'e Haeyehoek yn Broeksterwâld ta wenjen setten hawwe.
Wy wienen tige bliid mei dit moaie koppel fan acht froulju en in prachtige Hjerke.
Nettsjinsteande alle gefaren wie it team yn 2008 útbreide nei tolve froulju en noch hieltyd deselde Hjerke. Yn dy tiid kaam der sels ek noch fersterking foar Hjerke fan in wol hiel aparte soart ein.
Dizze oanfleaner like wol op in Cambell mar se hienen syn nekke fergetten. It liket wol as sit de kop fuottendaliks oan it liif fest. Mar de froulju fûnen it blykber wol in krease fint want hy die al ridlik gau deselde keunstkes as ús echte Hjerke.
Mar om de Cambell-soart dochs in bytsje rassúver te hâlden soargen wy der foar dat der dat jier gjin lytse Cambelltsjes kamen . Sels hie ik al yn gedachten dat it mismaakte oanfleanmantsje mei de Krystdagen mar yn it pantsje moast mar doe 't it safier wie koe ik it net opbringe en berôfje lytse Hjerke fan it libben.
Hy bleau sadwaande libjen en wat wie dat in gelok want it jier 2009 waard in rampjier foar de Cambell populaasje. Earst wie der rûzje tusken lytse en grutte Hjerke en lytse Hjerke ferdwûn mei twa prachtige froulju en grutte Hjerke bleau efter mei de oare tsien dames.
Mar oei, oei , oei.
Doe sloech it needlot ta en grutte Hjerke ferlear it iene nei it oare wyfke troch ûnbekende oarsaak en yn it neijier fan 2009 liet er sels ek it libben.
Doe wie de Cambell populaasje útstoarn mienden wy mar ta ús grutte ferrassing kaam der krekt foar de Krystdagen in frjemdsoartich Cambell-mantsje, mei in hiel koart nekje en twa prachtige Cambellfroulju yn ús rayon te wenjen.
Jawis, it wie lytse Hjerke dy 't mei rûzje fuortgien wie en no lokkich wer op de Haeyehoek wennet.
Kommend foarjier krijt er alle meiwurking om ien of twa Cambellgesintsjes te meitsjen en sadwaande de Cambell populaasje te rêden fan de ûndergong.
Miskien wurdt it dan wol in bysûndere populaasje want Cambellen sûnder nekke treffe jo net oeral oan. Hoopje as wy werris wat fan ús hearre litte dat it dan wat positiever wêze sil.
Undertusken binne wy drok dwaande om út te sykjen hoe oft de prachtige Cambellen om it libben kaam binne en mochten wy der mear oer fernimme dan litte wy dat seker wol efkes oan jimme witte.
Berend Visser.
foto lofts: de murd, de populaasje Cambellen stjert út, is dit de dieder?
